ԵՄԿ ՀԱՅԱՍՏԱՆԻ ՆԱԽԱԳԱՀ ԳԵՎՈՐԳ ՅԱՂՋՅԱՆԸ ՊԱՐԳԵՎԱՏՐՎԵՑ ՀՀ ՊՆ «ԴՐԱՍՏԱՄԱՏ ԿԱՆԱՅԱՆ» ՄԵԴԱԼՈՎ

 

2011 թ.-ի փետրվարի 23-ին յուրատեսակ միջոցառում էր կազմակերպվել Երևանի պետական բժշկական համալսարանում:

Ավանդաբար նշվող «Հայրենիքի պաշտպանի» օրը հատկապես յուրահատուկ դարձավ բժշկական համալսարանի դահլիճում արցախյան ազատամարտի մասնակից Վարդան Հովհաննիսյանի «Պատերազմ և խաղաղություն» փաստավավերագրական ֆիլմի ցուցադրումով:

Հանդիսությանը ներկա ՀՀ պաշտպանության նախարար Սեյրան Օհանյանը Գևորգ Յաղջյանին հանձնեց ՀՀ ՊՆ «Դրաստամատ Կանայան» մեդալ՝ արցախյան հերոսամարտի և հետպատերազմյան տարիների ընթացքում իրականացրած նշանակալի ծառայությունների ու բարձր առաքելության համար: Հանդիսությանը ներկա էին նաև ԵՄԿ անդամներ և կամավորներ:

ԵՄԿ-Ն ՀՐԱՎԻՐՎՈՒՄ Է «ՊԱՏԵՐԱԶՄ ԵՎ ԽԱՂԱՂՈՒԹՅՈՒՆ» ՖԻԼՄԻ ԴԻՏՈՒՄ-ՔՆՆԱՐԿՄԱՆԸ

Երևանի Մխիթար Հերացու անվան պետական բժշկական համալսարանի մեծ դահլիճում փետրվարի 23-ին, ժ. 15.00-ին, տեղի կունենա հանդիպում «Պատերազմ և խաղաղություն» ֆիլմի ռեժիսորի և դերակատարների հետ, այնուհետև կցուցադրվի ֆիլմը: Մուտքն ազատ է:

Ֆիլմն ստացել է հետևյալ մրցանակները.

1. «Թրայբեքա» կինոփառատոն, Նյու Յորք.  “Լավագույն նոր վավերագրող” մրցանակ:
2. «Ոսկե Ծիրան» միջազգային կինոփառատոն. “Լավագույն միջազգային վավերագրական ֆիլմ” մրցանակ:
3. Կինոքննադատների միջազգային  ֆեդերացիայի մրցանակ /ՖԻՊՐԵՍԿԻ/:
4. Ամստերդամի միջազգային վավերագրական ֆիլմերի փառատոն /ԻԴՖԱ/: Նոմինացիա Ջորիս Իվենթ մրցանակի համար:
5. Մեխիկոյի միջազգային կինոփառատոն. Ժյուրիի հատուկ մրցանակ:
6. «Տրիեստե» կինոփառատոն. Հանդիսատեսի մրցանակ:
7. «Դոկավիվ» փառատոն. Հատուկ մրցանակ:

Մանրամասն տեղեկությունների համար կարող եք այցելել այստեղ >>

“ՄԷԿ ԱԶԳ, ՄԷԿ ՈՒՂՂԱԳՐՈՒԹԻՒՆ”. աւարտուեց դասական ուղղագրութեան անվճար դասընթացը

“Երկիր եւ մշակոյթ” կազմակերպութեան  եւ Փարիզի “Մաշտոց” հայ լեզուի պաշտպանութեան միութեան կազմակերպած դասական ուղղագրութեան անվճար դասընթացն աւարտուեց: Դասընթացի մասնակիցները, ոգեշնչուած ձեռքբերած գիտելիքներով, կիսուեցին իրենց տպաւորութիւններով: Այն ընդհանրացուած ներակայացնում ենք ստորեւ.
“Այս դասընթացը բեկումնային եղաւ այն մէկ խումբ հայերիս համար, ովքեր սիրով եւ փութաջանօրէն իւրացնում էին հայոց լեզուի դասական ուղագրութեան կարծէս թէ արդէն մոռացուած մարգարիտները: Մեզ համար սա վերադարձ էր այն սուրբ ակունքներին, որտեղ իրենց հոգեւոր ծարաւն են յագեցրել հայոց մեծերը: Սա այն հիմքերից մէկն է, որն ինչպէս եւ շուրջ 1600 տարի առաջ կամենում էր Մեսրոպ Մաշտոցը, միաւորելու է աշխարհի բոլոր ծայրերում ապրող հայերին` դարձնելով մէկ ամբողջութիւն: Այս դէպքում արդէն “մէկ ազգ, մէկ մշակոյթ” կարգախօսին աւելանում է “մէկ ազգ, մէկ ուղղագրութիւն” կարգախօսը: Եւ այս վեհ գաղափարին հետամուտ լինելով` կարելի է գտնել մի փոքր ժամանակ եւ մի փոքր էլ ջանք` իւրացնելու համար այն մի քանի կանոնները, որոնց չիմացութիւնը հեռացնում է մեզ մեր նախնիներից, անջրպետ ստեղծում արեւելահայութեան եւ արմտահայութեան միջեւ: Դրանց իմացութիւնը թոյլ է տալիս հասկանալու մեր լեզուի բառարմատները, նախնական վիճակը, ինչպէս նաեւ` ընկալելու մեր լեզուի ողջ գեղեցկութիւնն ու վերագտնելու կորսուած հարստութիւնը”:

“ՀՈՒՍՈ ՃԱՆԱՊԱՐՀԸ” ՀՐԱՎԻՐՈՒՄ Է ԵՄԿ-ԻՆ

ՀԱՆԴԻՊՈՒՄ ԵՄԿ ՀԱՅԱՍՏԱՆՅԱՆ ՄԱՍՆԱՃՅՈՒՂԻ ԱՆԴԱՄՆԵՐԻ ՀԵՏ

“Երկիր և մշակույթ,, կազմակերպության հայաստանյան գրասենյակում 2011 թ.-ի փետրվարի 4-ին տեղի ունեցավ կազմակերպության նախագահ Գևորգ Յաղջյանի և վարչականների հանդիպումը կազմակերպության անդամների հետ: ԵՄԿ ընհանուր ժողովից առաջ  կազմակերպչական խնդիրների քննարկման  կարիք կար: Հանդիպման նպատակն էր նաև միմյանց հետ ծանոթացնել նոր անդամներին  և քննարկել հետագա աշխատանքների առաջարկություններ:

Գևորգ Յաղջյանը ողջունեց ներկաներին, խոսեց կազմակերպության աշխատանքների հիմնական նպատակների և ուղղությունների մասին: Նա կարևորեց ԵՄԿ աշխատանքների կազմակերպման նորացման խնդիրը, անդամների ակտիվ աշխատանքը և նոր անդամների նախաձեռնողականությունը: Ապա ներկայացան անդամները` համառոտ պատմելով իրենց և ԵՄԿ-ում իրենց կատարած աշխատանքների մասին: Այնուհետև ԵՄԿ վարչության անդամ Արմեն Քեշիշյանը ներկայացրեց կազմակերպությունում 2010 թ.-ին իրականացված աշխատանքները: Դրանք հիմնականում վերաբերում էին սփյուռքահայերի հետ միասին Կապանի Եղվարդ գյուղի Սբ. Աստվածածին եկեղեցու վերանորոգման աշխատանքներին հայաստանյան մասնաճյուղի անդամների մասնակցությանը, համատեղ արշավներին և կազմակերպության գրասենյակում տեղի ունեցած բազմաթիվ հանդիպումներին ու քննարկումներին: Նա նաև նշեց Փարիզի “Մաշտոց,, հայ լեզվի պաշտպանության միության հետ համատեղ կազմակերպությունում իրականացվող դասական ուղղագրության անվճար դասընթացների մասին, որին մասնակցում են շատ երիտասարդներ:

Այնուհետև լսվեցին առաջարկություններ կազմակերպության աշխատանքները բարելավելու և նոր ծրագրերի մասին: Եղան առաջարկություններ “Երկիր և մշակույթ,,-ի գիտահանրամատչելի գրականության մատենաշար հիմնելու, սահմանամերձ գյուղերի դպրոցների հետ ուսումնական ծրագրեր իրականացնելու, կազմակերպության գրասենյակի աշխատանքը բարելավելու, Երևանը մաքրելու և այդ ընթացքում նոր կամավորների` կազմակերպության մեջ ընդգրկման մասին: Եղավ քննարկում. կազմակերպության նախագահ Գևորգ Յաղջյանը կարևորեց հայաստանյան մասնաճյուղի ակտիվությունը, նոր ծրագրերի մշակումն ու իրականացումը, ծրագրերի իրականացման համար միջոցների որոնումը, ԵՄԿ անդամների մեջ համապատասխան մասնագետների ներառումը: Վերջում նա նշեց կազմակերպության ընդհանուր ժողովի նախապատրաստական աշխատանքների և անդամատոմսերի պատրաստման ու հանձնման մասին:

 

 

ԵՄԿ ՀԱՅԱՍՏԱՆԻ ՎԱՐՉՈՒԹՅԱՆ ՀԵՐԹԱԿԱՆ ՆԻՍՏՈՒՄ

“Երկիր եւ մշակույթ” կազմակերպության հայաստանյան գրասենյակում 2011 թ.-ի հունվարի 26-ին տեղի ունեցավ ԵՄԿ վարչության նիստ: Նիստում լսվեցին Հայստանի ԵՄԿ 2010 թ.-ի կատարված աշխատանքների հաշվետվությունները, ապա ներկայացվեցին 2011 թ.-ի նոր ծրագրերը: Կազմակերպության նախագահ Գևորգ Յաղջյանը ներկայացրեց ԵՄԿ հետագա աշխատանքների առավել արդյունավետ կազմակերպման մեխանիզմներ: Քննարկման ընթացքում վարչության անդամները հանդես եկան տարբեր առաջարկություններով: Նիստն այնուհետ արձանագրեց, որ Հայաստանի ԵՄԿ շարքերը գնալով համալրվում են նոր անդամներով և անհրաժեշտություն կա անդամների վերահաշվառման: Նիստում ընտրվեց 2011 թ.-ի ԵՄԿ ընդհանուր ժողովին մասնակցելու պատվիրակության թեկնածուների կազմը և որոշվեց այն ներկայացնել ԵՄԿ անդամներին` էլեկտրոնային քվեարկության համար:

ՄԵԿՆԱՐԿԵՑ ԴԱՍԱԿԱՆ ՈՒՂՂԱԳՐՈՒԹԵԱՆ ԱՆՎՃԱՐ ԴԱՍԸՆԹԱՑԸ

ԵՄԿ երեւանեան գրասենեակում 2011թ. Յունուարի 15-ին մեկնարկեց “Երկիր եւ մշակոյթ” բարեգործական կազմակերպութեան եւ Փարիզի “Մաշտոց” հայ լեզուի պաշտպանութեան միութեան համատեղ կազմակերպած դասական ուղղագրութեան անվճար դասընթացը: Այն կը տեւի մինչեւ Փետրուարի կէսերը: Դասընթացը վարում է դասախօս, Փարիզի “Մաշտոց” միութեան ներկայացուցիչ Մարօ Խաչատրեանը: Առաջին դասը նուիրուած էր Մեսրոպեան ուղղագրութեան վերականգնման կողմնակիցների միաւորման նկարահանած «Յարութիւն» շարժանկարի ցուցադրութեանը: Յաջորդ 8 պարապմունքների ընթացքում մասնակիցները կը ծանօթանան դասական ուղղագրութեան հիմնական օրէնքներին: Դասընթացի վերջում մասնակիցները կը ստանան Փարիզի “Մաշտոց” միութեան վկայականներ:

2010 in review

The stats helper monkeys at WordPress.com mulled over how this blog did in 2010, and here’s a high level summary of its overall blog health:

The Blog-Health-o-Meter™ reads Fresher than ever.

Crunchy numbers

A Boeing 747-400 passenger jet can hold 416 passengers. This blog was viewed about 2,000 times in 2010. That’s about 5 full 747s.

 

In 2010, there were 21 new posts, not bad for the first year! There were 117 pictures uploaded, taking up a total of 14mb. That’s about 2 pictures per week.

The busiest day of the year was October 28th with 111 views. The most popular post that day was “ԳՐԱԲԱՐ. ԼԵԶՈՒ ՆԱԽՆԵԱՑ” ՖԻԼՄԻ ԴԻՏՈՒՄ ԵՎ ՔՆՆԱՐԿՈՒՄ.

Where did they come from?

The top referring sites in 2010 were win.mail.ru, facebook.com, lcousa.org, mail.yahoo.com, and dolphin.am.

Some visitors came searching, mostly for lcoarmenia.com, lcoarmenia.am, Գևորգ Յաղջյանի նկարները, գևորգ յաղջյան, and lcoarmenia.

Attractions in 2010

These are the posts and pages that got the most views in 2010.

1

“ԳՐԱԲԱՐ. ԼԵԶՈՒ ՆԱԽՆԵԱՑ” ՖԻԼՄԻ ԴԻՏՈՒՄ ԵՎ ՔՆՆԱՐԿՈՒՄ October 2010
2 comments

2

ՀԱՆԴԻՊՈՒՄ – ԲԱՆԱԽՈՍՈՒԹՅՈՒՆ August 2010
1 comment and 1 Like on WordPress.com,

3

Julie Loosigian discovers heritage in Armenia October 2010
1 comment

4

ԵՄԿ Հայաստանի անդամների եւ կամավորների հանդիպումը ԵՄԿ ամերիկյան մասնաճյուղի վարչական անդամների հետ July 2010
3 comments

5

Contacts July 2010

“ԵՐԿԻՐ ԵՎ ՄՇԱԿՈՒՅԹ” ԿԱԶՄԱԿԵՐՊՈՒԹՅՈՒՆԸ ՇՆՈՐՀԱՎՈՐՈՒՄ Է ԲՈԼՈՐԻ ԱՄԱՆՈՐԸ ԵՎ ՍՈՒՐԲ ԾՆՈՒՆԴԸ

ՄԱՂԹՈՒՄ Է ՆՈՐԱՆՈՐ ՀԱՋՈՂՈՒԹՅՈՒՆՆԵՐ, ԱՌՈՂՋՈՒԹՅՈՒՆ ԵՎ ՆՊԱՏԱԿՆԵՐԻ ԻՐԱԿԱՆԱՑՈՒՄ ԳԱԼԻՔ ՆՈՐ ՏԱՐՈՒՄ

ԴԱՍԱԿԱՆ ՈՒՂՂԱԳՐՈՒԹԵԱՆ ԱՆՎՃԱՐ ԴԱՍԸՆԹԱՑ

“Երկիր եւ մշակոյթ” բարեգործական կազմակերպութիւնը եւ Փարիզի “Մաշտոց” հայ լեզուի պաշտպանութեան միութիւնը համատեղ կազմակերպում են դասական ուղղագրութեան անվճար դասընթաց: Դասընթացը (9 պարապմունք) կ’անցկացուի 2011թ. Յունուարին “Երկիր եւ մշակոյթ” կազմակերպութեան երեւանեան գրասենեակում:
Դասընթացի վերջում մասնակիցները կը ստանան Փարիզի “Մաշտոց” միութեան վկայականներ:
Դեկտեմբերի 25-ին՝ 17:30-ին, “Երկիր եւ մշակոյթ” կազմակերպութեան երեւանեան գրասենեակում (Հանրապետութեան 37, մուտքը` Մելիք-Ադամեան փողոցից) տեղի կ’ունենայ հանդիպում դասընթացը վարող դասախօս, Փարիզի “Մաշտոց” միութեան ներկայացուցիչ Մ. Խաչատրեանի հետ, որը կը ներկայացնի դասընթացի նպատակները, անհրաժեշտութիւնը եւ այլ տեղեկութիւններ: Կը կատարուի դասընթացին մասնակցել ցանկացողների նախնական գրանցում:
Սիրով հրաւիրում ենք հանդիպմանը:

ՀԱՆԴԻՊՈՒՄ ԶԱՐԵՀ ՊԱԼՅԱՆԻ ՀԵՏ

“Երկիր և մշակույթ կազմակերպության” երևանյան գրասենյակում նոյեմբերի 24-ին տեղի ունեցավ հանդիպիպում ՀՀ օրհներգի առաջարկվող նոր տարբերակի համահեղինակ Զարեհ Պալյանի հետ: ՀՀ օրհներգի փոփոխության հարցը բազմիցս քննարկվել ու նոր օրհներգի մրցույթ էր հայտարարվել և “ՀՀ օրհներգի մասին” ընդունված օրենքի անցումային դրույթի համաձայն ներկայում գործող օրհներգն ուժի մեջ է մինչև ՀՀ նոր օրհներգի տեքստն ու երաժշտությունը օրենքով սահմանելը:

Հանդիպման ընթացքում քննարկվեց օրհներգի առաջարկվող տարբերակը (խոսք` Զարեհ Պալյանի և Գևորգ Կարվարենցի, երժ.` Բարսեղ Կանաչյանի) և ցուցադրվեց դրա տեսահոլովակը: Ներկաները, որոնց թվում էին նաև երաժշտագետներ, մատնանշեցին այս տարբերակի մի շարք առավելությունները: Հանդիպման վերջում խոսվեց նաև օրհներգում երաժշտության և խոսքի ներդաշնակության կարևորության, ինչպես նաև միմյանց նկատմամբ դրանցից մեկի հնարավոր առաջնայնության խնդրի շուրջ:

ԵՄԿ ԱՆԴԱՄ ՀՌԻՓՍԻՄԵ ԳՐԻԳՈՐՅԱՆԻ ՆԿԱՐՆԵՐԻ ՑՈՒՑԱՀԱՆԴԵՍԸ

Հայաստանի նկարիչների միությունում նոյեմբերի 12–ին բացվեց նկարչուհի, “Երկիր և մշակույթ” կազմակերպության անդամ Հռիփսիմե Գրիգորյանի անհատական ցուցահանդեսը: Բացման խոսքով հանդես եկավ Հայաստանի նկարիչների միության նախագահ Կարեն Աղամյանը, ապա ելույթ ունեցավ սիրված դերասան Ազատ Գասպարյանը: Նրանք շատ բարձր գնահատեցին նկարչուհու ստեղծագործությունները և ողջունեցին հեղինակի ջերմ ու լուսավոր մղումները:  Շնորհակալական խոսքով հանդես եկավ Հռիփսիմե Գրիգորյանը` հույս հայտնելով, որ իր նկարների լույսից շատերը գուցե տանեն իրենց հետ: Ցուցահանդեսին հրավիրված ԵՄԿ կամավորներն ու անդամները բավական տպավորվեցին նկարների  բազմաոճության մեջ հեղինակի հոգու լույսի թափանցիկության ու խորհրդավորության մատուցման  մտահաղացումների յուրօրինակությամբ:

ՀԱՆԴԻՊՈՒՄ ԿՈՄԻՏԱՍ ՎԱՐԴԱՊԵՏ ՀՈՎՆԱՆՅԱՆԻ ՀԵՏ

“Երկիր և մշակույթ” կազմակերպության երևանյան գրասենյակում նոյեմբերի 11-ին տեղի ունեցավ հանդիպում հայորդաց տների տեսուչ-տնօրեն Կոմիտաս վարդապետ Հովնանյանի հետ: Բանախոսության թեման էր` “Բավարացիների, գալերի և բրետոնների հայկական ծագման խնդիրը”: Բանախոսը ներկայացրեց իր ուսումնասիրությունների ընթացքում հայտնաբերած մի շարք ուշագրավ փաստեր, որոնք խոսում են վերոնշյալ ցեղերի հայկական ծագման օգտին: Վերջում նա հաճույքով պատասխանեց ներկաների տարաբնույթ հարցերին: Հավաքվածներին գրավեց ոչ միայն բանախոսության թեման, այլև Կոմիտաս վարդապետի մաքուր հայեցի խոսքը: Հանդիպմանը ներկա էր նաև Զարեհ Պալյանը, որը բանախոսին և լսարանին ներկայացրեց ՀՀ օրհներգի իր տարբերակը:

 

ՀԱՆԴԻՊՈՒՄ ԱՄՀ ՆԱԽԱԳԱՀԻ ՏԵՂԱԿԱԼ ԷԴՎԱՐԴ ՍԱՖԱՐՅԱՆԻ ՀԵՏ

“Երկիր և մշակույթ” կազմակերպության երևանյան գրասենյակում նոյեմբերի 5-ին տեղի ունեցավ հանդիպում Հայաստանի ազգային մրցունակության հիմնադրամի (ԱՄՀ) նախագահի տեղակալ Էդվարդ Սաֆարյանի հետ: Նա ներկայացրեց հիմնադրամի գործունեության հիմնական երեք ուղղությունները` տուրիզմ, բժշկություն, կրթություն: Բանախոսը ներկայացրեց Տաթևի ճոպանուղու իրականացման մանրամասները, ապա  կանգ առավ մասնավորապես բժշկության ոլորտում հիմնադրամի իրագորարծած և կատարվելիք ծրագրերի վրա: Այնուհետև նա պատասխանեց հավաքվածների մի շարք հարցերին: Վերջում բանախոսին և հյուրերին  ներկայացվեցին Հայաստանում և հատկապես Տաթևում ԵՄԿ իրականացված ծրագրերը:

Հանդիպման մասին կարդացեք նաև այստեղ >>

“ԳՐԱԲԱՐ. ԼԵԶՈՒ ՆԱԽՆԵԱՑ” ՖԻԼՄԻ ԴԻՏՈՒՄ ԵՎ ՔՆՆԱՐԿՈՒՄ

“Երկիր և մշակույթ” կազմակերպության երևանյան գրասենյակում հոկտեմբերի 27-ին տեղի ունեցավ “Ծիրանի” ՀԿ նկարահանած “Գրաբար. լեզու նախնեաց” ֆիլմի ցուցադրությունը (ռեժիսոր` Նարեկ Աշուղաթոյան): Ֆիլմը մեծ ոգևորությամբ ընդունվեց ներկաների կողմից. բուռն քննարկման ընթացքում խոսվեց ֆիլմի` երիտասարդության մեջ գրաբարի հանդեպ սեր և հետաքրքրություն արթնացնելու նպատակաուղղվածության և հարակից այլ խնդիրների մասին: Վերջում քննարկվեց ԵՄԿ և “Ծիրանի” ՀԿ համագործակցության հեռանկարների հարցը:

Julie Loosigian discovers heritage in Armenia

PELHAM, N.H.—For someone who knew little about her Armenian heritage, Julie Loosigian has come a long way.All this after spending this past summer as a volunteer worker in the village of Yeghvart, right by the Azerbaijan border.The 21-year-old is into her senior year at the University of New Hampshire, majoring in English and minoring in race, culture, and power, along with African studies. Read more…

www.armenianweekly.com

“ՀԱՎԱՏՔ ԵՒ ԺԱՌԱՆԳՈՒԹՅՈՒՆ” ԱՐՇԱՎ ՏԱՎՈՒՇԻ ՄԱՐԶ

,,Երկիր և մշակույթ,, կազմակերպության ,,Հավատք և ժառանգություն,, ամենամյա արշավը, նվիրված Մեսրոպ արքեպիսկոպոս Աշճյանի հիշատակին, այս տարի տեղի ունեցավ սեպտեմբերի 11-12-ը Տավուշի մարզում: Արշավին մասնակցում էին ԵՄԿ 16  անդամներ:

Արշավականները նախ այցելեցին XIII դարի Բերդավան ամրոց: Այն գտնվում է սահմանամերձ Բերդավան գյուղի հարավ-արեւելյան կողմում: Հին ամրոցը հիմա էլ հայկական սահմանների լուռ պահապանն է: ,,Հավատք եւ ժառանգություն,, արշավի  պատասխանատու Դավիթ Դավթյանը պատմեց ամրոցի մասին: Ամրոցի մոտ գտնվում է խոնարհված բազիլիկ եկեղեցի ու բազմաթիվ խաչքարերով գերեզմանատուն: ԵՄԿ անդամները մաքրեցին եկեղեցու խորանը, մասամբ նաև ներսը, որն ամբողջովին թփածածկ էր: Տեղացող անձրևի պատճառով հնարավոր չէր երկար աշխատել:

Հաջորդ կանգառը Մշկավանք XIII դարի վանքային համալիրն էր, որը գտնվում է Կողբ գյուղի մոտակայքում` բարձրադիր անտառապատ սարահարթի վրա: Տեղացող անձրևի տակ բեռնատարով վանքին հասնելը կրկնակի ոգևորություն ու խորհուրդ հաղորդեց արշավին: Մասնակիցները զարմացած էին լքված ու անմարդաբնակ վայրերում նման համալիրի գոյությամբ: Բարձրադիր սյուներն ու խաչքարերը վկայում էին կառուցողների ու միաբանների բարձր մշակույթի մասին:

Այցելությունը Ոսկեպար գյուղի Ս.Աստվածածին եկեղեցի` թե՛ բերկրանք էր, թե՛ պատասխանատվություն: Այն սահմանին շատ մոտ է, և հայ զինվորներն ուղեկալից զգուշացնում էին արևելյան կողմ չանցնելու մասին, որը ադրբեջանական բանակի դիտակետում էր: Եկեղեցին կարծես երկրի սահմանին  հոգևոր սյուների գոյության խորհրդանիշը լիներ. բարձր, վեհ, անսասան, երկնախորհուրդ…

Արշավականների գիշերատեղին հյուրընկալ Աչաջուր գյուղն էր: Գյուղի մշակույթի տունը և հանդիպումները տեղի բնակիչների հետ վկայեցին հոգևոր ու  մշակութային արժեքների  նկատմամբ նրանց ունեցած յուրահատուկ վերաբերմունքի մասին: Սեպտեմբերի 12-ին ԵՄԿ անդամները եղան հայտնի Մակարավանքում (VII- XIII դդ.): Անտառի լռության մեջ վեր խոյացող, խաչքարերով, բարձրաքանդակներով ու արձանագրություններով հարուստ վանական համալիրն իր ամեն մի խորշում խորին մի խորհուրդ ուներ: Այն առավել իմաստավորվեց վանքի քահանա տեր Թորգոմի խոսքով: Վանքի ու տեղի  ավանդազրույցների մասին նրա պատմածներն օգնեցին արշավականներին հաղորդակից դառնալ Մակարավանքի խորհրդին: Վանքի տարածքը բավական բարեկարգ էր, ուստի և մաքրության անհրաժեշտություն առանձնապես չէր զգացվում: Փոխարենն այնտեղ մի քանի օրվա հողային աշխատանքների կարիք կար:

Արշավականների հաջորդ կանգառն Ակնաղբյուր գյուղն էր, որտեղ  գտնվում է Վարդան Մամիկոնյանի տնկած ծառը: Սրբատեղի դարձած, տապալված ու մոխրացած ծառի և նոր կառուցված մատուռի միջոցով երիտասարդները հաղորդակից էին դառնում հայ քրիստոնեական բազմադարյա արժեքներին: Վերջին կանգառը Լուսահովիտ գյուղն էր և Ծռվիզի Մորոձորո վանքի Ս. Աստվածածին եկեղեցին: Այն V դարի գմբեթավոր քառախորան մի եկեղեցի էր. ձորի եզրին գողտրիկ ծվարած մի գոհար:

Վատ եղանակի պատճառով չհաջողվեց լինել նախատեսված բոլոր վայրերում, բայց արշավականները վերադարձան Երևան` բավականության ու ոգևորության զգացումներով տոգորված: Հոգևոր արժեքներին հաղորդակցվելու և նախնյաց ժառանգությունը պահպանելու խորհուրդը բոցավառվել էր բոլորի հոգիներում:

ՀԱՆԴԻՊՈՒՄ – ԲԱՆԱԽՈՍՈՒԹՅՈՒՆ ՀԻԼԴԱ ԳԱԼՖԱՅԱՆԻ ՀԵՏ

“Երկիր և մշակույթ” կազմակերպության երևանյան գրասենյակում օգոստոսի 26-ին տեղի ունեցավ հանդիպում-բանախոսություն Սորբոնի համալսարանի պրոֆեսոր, բանաստեղծուհի,  հայագետ, հոգեբան, մանկավարժ, Փարիզի “Մաշտոց” հայ լեզվի պաշտպանության միության նախագահ Հիլդա Գալֆայանի հետ: Հանդիպման սկզբում ներկաներին ողջունեց  ԵՄԿ նախագահ Գևորգ Յաղջյանը, այնուհետև կազմակերպության վարչության անդամ Արմեն Քեշիշյանը ներկայացրեց հարգարժան բանախոսին:

Բանախոսության թեման էր` “Մեսրոպյան ուղղագրության առավելությունները”,  ինչն արդիական է թե’ Հայաստանում, թե’ Սփյուռքում: Պրոֆեսոր Հիլդա Գալֆայանը  ներկայացրեց բավական հետաքրքիր  պատմական փաստեր, որոնք բացահայտում էին մեսրոպյան ուղղագրությունից հարկադրաբար հրաժարվելու պատճառները: Նա նշեց, որ մեսրոպյան ուղղագրությանը վերադառնալը արմատներին հաղորդակցվելու խնդիր է, և ուղղագրության փոխությունները պետք է  միասնական լինեն Հայաստանի եւ Սփյուռքի համար: Կազմակերպության անդամներն ու կամավորները ակտիվորեն մասնակցեցին քննարկմանը: Վերջում Հիլդա Գալֆայանը պատասխանեց ներկաների բազմաթիվ  հարցերին: Հանդիպումը լուսաբանվեց նաև Հայաստանի հանրային ռադիոյի  “ԼյունՍե” ծրագրով:

Ռադիոհաղորդումը կարող եք ունկնդրել այստեղ»

ՀԱՆԴԻՊՈՒՄ ԵՄԿ ԱՆԳԼԻԱՅԻ ՄԱՍՆԱՃՅՈՒՂԻ ՆԱԽԱԳԱՀԻ ՀԵՏ

ԵՄԿ երևանյան գրասենյակում օգոստոսի 14-ին տեղի ունեցավ ԵՄԿ Հայաստանի մասնաճյուղի նախագահի և վարչականների հանդիպումը ԵՄԿ Անգլիայի մասնաճյուղի նախագահ Արմեն Թոփալյանի հետ: Վերջինս ԵՄԿ սփյուռքահայ կամավորների հետ Հայաստան էր եկել մասնակցելու Շիրակամուտ գյուղում գտնվող Չիչխանավանքի պեղումներին: Հանդիպման ընթացքում ԵՄԿ Հայաստանի նախագահ Գևորգ Յաղջյանը ներկայացրեց կազմակերպության ընթացիկ և առաջիկա ծրագրերը: Քննարկվեցին ԵՄԿ Հայաստանի և Անգլիայի մասնաճյուղերի համագործակցության հետ կապված հարցեր և հարակից այլ խնդիրներ: Արմեն Թոփալյանը, ողջունելով ԵՄԿ հետագա զարգացման հայաստանյան առաջարկները, իր հետ  վերցրեց  համագործակցության մասին ներկայացված ծրագրերը ԵՄԿ Անգլիայի վարչության նիստում քննարկելու համար: Վերջում հյուրը ծանոթացավ ԵՄԿ երևանյան նոր գրասենյակի հարմարավետ պայմաններին:

“ՀԱՎԱՏՔ ԵՒ ԺԱՌԱՆԳՈՒԹՅՈՒՆ” ԱՐՇԱՎ

“Երկիր և մշակույթ” կազմակերպությունն այս տարի նախատեսում է իրականացնել “Հավատք և ժառանգություն” հերթական արշավը դեպի Տավուշի մարզ, որը նվիրված է լինելու երջանկահիշատակ Մեսրոպ արքեպիսկոպոս Աշճյանի հիշատակին: Եռօրյա արշավի ընթացքում նախատեսվում է ճանաչել և բարեկարգել մարզի Նոյեմբերյանի և Իջևանի տարածաշրջանների մեկ տասնյակից ավելի պատմաճարտարապետական հուշարձաններ: Արշավին կմասնակցեն ինչպես փորձառու, այնպես էլ ԵՄԿ նոր անդամներ: